|
http://www.3weekly.com/common/content.htm?link=threeweekly/0347/ent/20060603ent0082/content.htm&topic_id=0301
敬陪末座 黃德斌
敬陪末座，可以解作靜靜地坐在角落、坐在旁邊；又可以解作最後一名，陪跑的意思；亦可解作因為地位低而坐在最後面的座位。無論是那一種解釋，都適用在黃德斌身上。
在《火舞黃沙》中，黃德斌被列入「七大主角」之一，連黃德斌都承認，《火舞》中的宋東陽，的確是他入行以來佔戲最重的電視劇。
位列七大，本應高興，但論排位，又是最後，變成「七大之末」，即是車邊陪六位主角跑的「小太監」，只是比配角好一點，但做人又忌高不成低不就，要不就最好，萬人敬仰；要不就最差，就算失業都可以綜援，中產永遠最大壓力，連交稅比例都係最高。
對於「七大之末」，黃德斌不敢有太大怨言，「一直以來我都覺得明星、偶像係人封，唔係你自己話係就係，我冇介意過做包尾。喂，有得企埋去同陳豪、林保怡相提並論，仲想點？我只係希望你繼續睇，睇黃德斌跟住會係點？我只係想你會覺得，黃德斌係掂，咁就得喇！」
陪跑又好，包尾又好，當《火舞黃沙》無論劇情、收視、主角表現都差強人意時，就是他這種含辛茹苦、默默耕耘的人抬頭之時，君不見三位男主角中，黃德斌率先跑出，成為第一個上雜誌封面的「火舞男」麼？
聽講，仲有健身中心睇中佢又平又大隻，搵佢做代言，有名又有利，敬陪末座又如何？
雖然又平又大隻，都係人家請苦力首要條件。
讀書不成
每個藝人都有未紅時，有大明星會講自己未紅時日日粗茶淡飯、一條底褲兩個人來證明自己紅得有道理，或者說服自己走紅後夜夜笙歌大魚大肉只是「返自己應得的」；但「我未成名的辛酸史」對黃德斌而言，根本不值一哂亦不值一提，因為人人都有過去。
「做過就唔怕認！」這是黃德斌說的！
咁豪氣，以為起碼會講「細個偷人底褲」、「讀書揭女同學裙底」這些爆炸性內容，可是一概欠奉。
「我又唔係要博別人同情，你有歷史，我又有歷史！以前有幾慘、有幾難捱都已成過去，有咩好講？」口話唔講，但一早又講明自己口硬心軟，鐵漢柔情，所以最後還是忍不住講出過去點滴，原來又是小子成長的劇情。
黃德斌幼時家中有五個成員，母親患上乳癌，舅父意外去世後，母親接受不了多重打擊而患上精神病，父親是個普通警員階至沙展，收入微薄，生活環境屬於飽不死，餓不壞。至於他自己，自少已知不是讀書材料，勉強讀至中五，連放榜也等不及就去找工作，目的只是希望自給自足，不要成為家庭負擔。
入娛樂圈前，做過跟車、倉務、sales，最後因為生得高大加上走肥（黃德斌說當時還沒有健身，算不上健碩），在朋友介紹下做兼職模特兒，年多後轉為全職，因為希望增加工作量，開始去健身，一身健碩溝死女的身型，亦由當時開始練就。
三級之路
有人為做明星千方百計入娛樂圈，五音不全一樣參加新秀，木口木面連喜怒哀樂表情都做不來一樣參加藝訓班，而黃德斌做了全職模特兒，半隻腳入了娛樂圈，卻從沒發過明星夢，墮入紅塵，只不過想搵多些錢糊口，亦因為好友林俊賢「多手」之故。
1988年，黃德斌做了年多模特兒，開始發覺這行生命有限，並不長遠，正在為前途發愁之際，同樣是模特兒的好友林俊賢，暗地裏替黃德斌安排好一切。
「當時我都冇留意TVB開藝訓班，有一日林俊賢同我講，TVB開藝訓班，不如去試啦，連表格都幫我拎埋，咁我就想不如試，又未必入到。點知又畀我面試成功，最後仲畢埋業，就係咁樣轉型做藝員。」畢業之後，黃德斌做了一輪「不是咪郁，就是打劫」的警員甲、匪徒乙、同事丙、損友丁，直至演出連周星馳都有份做《阿德也瘋狂》，黃德斌終可以有正式的對白，有機會同其他角色對稿。
以為守得雲開，繼續默默耕耘定會有成果，1993年約滿TVB，得到只是一封「多謝你多年來的演出」的大信封。離開TVB後，黃德斌為了生活，在朋友介紹下轉戰電影圈，做過副導、亦做過場務，連服裝設計助手的助手亦沒有放過。最後為了生活，接拍人生第一部三級片《燈草和尚》，女主角是02年自殺身亡的陳寶蓮。
「係拍過三級片就唔怕認，我都要生活，我都要搵錢，露股就有男主角做，片酬又唔少，最重要係TVB幫我接，我仲有乜好怕？」如此聽教聽話、任搓任使，TVB終於「識英雄重英雄」，黃德斌97年重返TVB，事業亦開始有轉機。
越南危機
所謂「有危才有機」，經過四年影圈朝不保夕的生活之後，更加懂得珍惜機會，當然，在TVB起碼唔使除褲露股先有餐飯食。一套長壽劇《真情》令黃德斌人氣急升，以為可以吐氣揚眉，危機卻又再出現。
97年一部《真情》，至少救活了兩個人，一個是好姨薛家燕，另一個就是飾演越南的黃德斌。當時的黃德斌，走在街上，十個街坊十個都是叫他做越南，更有人以為他真的是越南人。但《真情》之後，黃德斌又開始打回原形，繼續飾演一些無關痛癢的小角色，莫說被觀眾遺忘，連娛樂記者一樣以為他轉了行。那時的黃德斌，為了生計惟有搵兼職賺外快，替更司機、街邊小販，總之有錢賺就做。
「陣時真係好難捱，擺街邊做小販又有人認得我，以為係電視台拍整蠱節目，但冇辦法，我都要搵錢生活。」直至98年，一部《妙手仁心》，飾演有情有義的江湖大佬何德廣，又再次為黃德斌帶來希望。
「《妙手》陣時，我人氣的確係幾好，但可惜同《真情》一樣，劇集播完之後，就好似冇事發生過，我又係繼續等通告、繼續拍一無關痛癢角色，雖然我一直都明白一個人紅唔紅，唔係自己話事，但講就易，要接受原來好難，所以我都曾經問過我自己，係唔係時候應該轉行，如果繼續咁落去，我會變成點？但最後我都同自己講，我唔可以就咁走去，我唔想將來會因為當時放棄而後悔。如是者又係咁做，直至04年《金枝慾孽》，因為小祿子好似幾受歡迎，又有希望，但到最後咪又係唔輪到我，其實之後我都好down，拍《血戰軒轅》時成日無緣無故發脾氣，我仲以為自己有抑鬱症，終於都捱過。而家畀我等到《火舞》，我唔敢講我今次一定會紅，但對我講至少係一個機會，我已經心滿意足。」
溫柔型男
人不可以貌相，連小朋友都識講，但又有幾多人真係可以唔以貌取人？黃德斌外型粗獷，予人一個應該幾大男人的感覺，偏偏他卻自言是一個小男人，因為他非常注重女伴的感覺，一切會以女伴行先。外型man過X-man，性格又溫柔，粗中帶細，難怪連信了教的蔡少芬及幾乎不食人間煙火的邵美琪，都曾經和他傳過緋聞。
近一個多月，黃德斌的見報率及緋聞，比過去17年的總和還要多。緋聞方面，先有傳向老拍檔蔡少芬大獻殷勤，之後又有傳與久未有男伴的邵美琪擦出愛火花，更成功破處登上娛樂雜誌封面，有得上封面，至少應該開心半日。
不過他卻對這種「成就」沒有太大的感覺，有與冇分別不大，他只是堅持不會為了博見報主動造新聞。
「其實入行第一日就已經知道，要出位要有人識，造緋聞係最佳捷徑，早在《真情》時已經有記者叫我夾造新聞，但我覺得如果係現實中畀你影到，例如我隨處小便話，我做得出就唔怕認，冇乜所謂；但如果係專登同某女星造緋聞而見報，我覺得唔係咁好，好似好影響其他人。我唔係話介意同圈中人拍拖，其實圈裏圈外我都覺得分別唔大，最重要係大家覺得舒服，大家開心，我係一個比較重大家感覺人，你問我大唔大男人？我諗我唔算大男人，我會聽女朋友講，我同女朋友都係有商有量，我亦好緊張女友開唔開心，就算係分手，我都會先諗對方感受。我一直都認為，一對拖友就算分手唔一定冇朋友做，只係睇你點去面對。我以前女朋友又點？過去，唔好提！你又有戀愛故事，我又有戀愛故事（巴士阿叔上身？），都係差唔多！」
男人．老狗
我承認我係以貌取人，當一身橫練肌肉黃德斌同我講，話佢可以有幾柔情、有幾體貼時候，我係抱過懷疑態度。但當訪問完過後，我停車場見到黃德斌為愛犬「肥豬」上車前清潔情況，種細心、種溫柔、種肥豬前、肥豬後稱呼，的確溫柔得有點肉麻。
記得有人話過，但凡對寵物有愛心人，衰極都有限，我絕對同意，因為我都有養狗，所以我知道。
| 
IP卡
狗仔卡
发表于 2006-6-3 13:38:27
提升卡
置顶卡
沉默卡
喧嚣卡
变色卡
显身卡
发表于 2006-6-3 21:10:00
发表于 2006-6-4 03:37:46
发表于 2006-6-4 12:46:27