|
http://hejnom.blogspot.com/2006_05_13_hejnom_archive.html
《今生無悔》十五周年 (上)
見早前大家咁熱烈咁講起 “今生無悔”, 令我戚起條筋走去搵番本超珍藏“今生無悔”特刊出o黎, 回味o下呢套當年我曾經瘋狂追睇o既劇集! 再睇o左好多本1991年o既舊“香港電視”+“大眾電視”…咁o岩睇到, 原來呢套劇係1991年5月13日(星期一)首播…正正係十五年前o既今日…就等一眾“今生無悔”迷o係呢度同套劇慶祝十五周年 (哈哈哈…好無聊!)!
又係一個情意結…正如早前有個朋友同我講, 佢去睇F4演唱會, 除o左係去欣賞佢o地演出之外, 亦係一個情意結…睇到佢o地四年後再一次走埋一齊, 亦諗番起自己四年來o既改變, 所以別有一番滋味! 我極度認同佢呢個講法, 好似之前成日講o既“刑事偵”, 依家十年後睇番, 其實“回味當時o既快樂時光”比起“睇番d劇情”佔一個更重要o既比重…因為你睇到某套戲, 就不期然會勾起好鄌個段時間o既好多回憶!
1991年5月13日, 正值小學六年級final exam, 都話考試期間係會特別投入追電視劇…連廣告汁都撈埋! 同期亞視就播緊另一套我好鍾意睇o既戲 “大提琴與點三八” …又係好好睇…唯有兩邊追! 不過有好劇睇, 其實又可以推動到我更加快去溫好晒d書開開心心睇電視去…所以我覺得電視台播多d高質素o既好戲, 絕對有助學生提高溫習效率!
三年前曾經寫過一段關於“大提琴與點三八”+“今生無悔”o既內容:
“我記得佢首播時咁o岩係考緊final, 當時已經係靠電視節目推動我去讀書o架喇; 所以發現o左夜晚7點有套咁好睇o既戲o既時候, 就迫自己7點前讀好晒d書 (雖然當年讀書都真係幾求其…一邊睇電視, 一邊玩game boy, 再一邊同同學仔煲o下粥…再間唔中望o下本書); 仲記得睇到10幾集o既時候, 無線開始7:30首播更經典o既“今生無悔”…兩邊都咁好睇, 好難取捨呀! 當然, 最後緊係“左右逢源”, 錄o左佢o黎睇咪得囉!”
睇番d舊“大眾”, 有好多期都係有讀者寫信去問究竟 “今生無悔”幾時播…原來呢套劇當年2月已經拍好晒, 但因為無線一路諗住留番呢套超強製作o黎同亞視打硬仗 (依家已經無呢支歌仔唱, 因為亞視自製o既劇集一年都未必有五套)…不過後來等極亞視套“暴雨燃燒”都未拍完, 所以最終都係等唔切, 鐵定o係5月13日首播…“大眾”仲話佢o地特登同無線一齊整o左本特刊…我諗就係我買o左o個本o卦…應該無第二本特刊嘛?! 佢o地仲話當時一推出已經差唔多賣晒…可見呢套劇有幾咁勁!
搞到我都要即刻再咀嚼番當年自掏腰包以港幣38大元o係屋企留下間“ok便利店”買o既“今生無悔”特刊…
呢本o野都可算係珍藏中o既珍藏, 經典中o既經典…雖然keep得唔係幾好, 完全甩皮甩骨, 每頁都diu diu fing (但當初買o左無幾耐已經係咁, 某程度上我覺得本o野有d粗製濫造…但都不失為一本精美o既電視劇特刊)…我為小時候o既我捨得用大部份o既儲蓄o黎買呢本精美特刊而感到驕傲…須知道作為一個小學六年級生o既我, 當時係無咩零用錢, 38蚊已經用o左我成副身家咁滯…但如果我無買到呢本“今生無悔”特刊, 必定會“終身抱憾” !
唔係睇番呢本“今生無悔”特刊, 都唔知原來邵美琪曾經係某周刊選舉o既1990年最受歡迎女藝員第一位…一眾年紀比我細o既讀者, 可能直頭唔知邵美琪曾經係無線no.1花旦, 仲要係紅到呢個地步…大家可能只係會記得佢o係“奪面雙琪”事件後出番o黎拍劇o個個年華老去o既樣…真係歲月不求饒人, 花旦o既壽命係短過小生好多!
不過即使我當年有witness佢當紅時期, 我都唔知佢曾經拿過呢個“最受歡迎女藝員第一位”…我連睇過呢段報導o既印象都無…我諗, 其實我當年係無睇晒成本特刊o既! 無錯, 雖然當時我一買番o黎係拿住本o野“luun”o左好耐, 但我主攻都係黎明同周海媚o既部份…因為當年我係最支持程朗同沈文薏o既…展翹個角色, 就真係好煩又唔多討好囉 (同埋我真係唔多喜愛邵美琪o係呢套劇個“頭盔”頭, 比起“我本善良”個“俄羅斯屋頂”頭更唔得)! 至於高天俊, 其實初段未變奸時真係幾咁年青有為又討好…愛妃even話因為高天俊而入大學時想讀archi, 可見大奸角都有佢o既支持者! 唔知o個時又有無其他朋友睇呢套劇係鍾意睇溫兆倫或邵美琪o既呢?
不過無得講, 個焦點點都o係黎明同周海媚度…畢竟佢兩個先係最主線, 而黎明又確係同海味襯過同邵美琪, 再加上佢兩個o個時傳得鬧烘烘o既緋聞, 更加順勢幫套劇宣傳埋! o個時黎明急速冒起,“人在邊緣”後就呢套“今生無悔”, 再加上歌影視三淒…紅到你行到邊都會見/聽到佢o既蹤影…所以傳出佢同海味拍拖, 佢d fans直頭話要杯葛海味!
(四位主角輪流合照…請留意老黎同發瘟張o個張…唔知阿黎生知唔知個“反v”其實係粗口手勢o黎o既呢? 定係當時仲未係呢?!)
而呢套劇o既最最最主角, 亦當然係黎明…咁佢當時又係型仔o既, 所以成本特刊都係以佢為重點…而我當年睇呢本o野, 亦都係以睇佢同海媚為重點 (同埋我當年一路都幾喜歡海味o架, 尤其係90年“成功路上”時)…所以15年後o係愛上o左“我本善良”之後再睇番呢本特刊, 個approach反而唔同晒!
其實我多年來都無咩點鍾意過黎生…唯獨係o係“程朗”年代幾buy佢囉…其實“藝員”黎明係比“歌星”黎明討好好多…至少我係咁覺得! 佢o係tvb做o個d角色, 其實真係幾唔錯o架… “天涯歌女”啦,“人在邊緣”啦, 仲有另一套同海味合作o既“回到未嫁時”啦…當然, 最討好始終係“程朗”! (不過到佢走紅歌壇後返番無線拍o既“原振俠”同埋“阿sir早晨”…我就不太喜歡喇! o個陣o既佢已經太自覺係一個歌星…好造作!)
本特刊仲勁到有個“人物關係表”列晒所有角色出o黎…連上次提過o既歐陽波比, 師奶殺手張大勇都有晒! 仲有王綺琴, 崔嘉寶, 陳慧儀, 陳家賢, 張靜, 馮素波, 黃愷欣, 許紹雄, 白茵, 關海山, 劉兆銘…當然不得不提o個時我成日將佢同黎耀祥撈亂, 近期做“潮爆大狀”要同童星江麗娜做一對o既陳國邦…呢套劇我覺得佢做得幾好, 幾buy佢個角色! Oh, 仲有第五大主角…當年o既譚詠麟歌迷會會長楊美儀小姐…佢個角色都好吃重o架…居然嫁o左俾“萬人迷”高天俊喎!
仲有o個個其實我覺得比起小柏林更好戲又更靚仔o既小演員英麒 (佢都有份做“柏林週記”, 都係叫“英麒”, 應該係佢個真名!)…佢做黎明個仔又係做得好好, 好得意, 好生鬼, 好討人喜愛…可惜做完呢套戲又唔見o左佢! 依家佢應該好似柏林仔咁入大學喇…唔知呢個小朋友又變成咩樣呢?
當時真係好迷“今生無悔”…仲同個同學仔晚晚傾電話, 將班裡面d同學全部代入劇中角色…好鬼死投入! 不知不覺, 咁就15年…真係令人勾起好多童年回憶…唔知大家又對呢套15年前o既經典之作有咩回憶呢?
(待續)
http://hejnom.blogspot.com/2006/05/5-14sun.html
今生無悔主題曲 (下)
(續前篇)
講開15年前的經典劇“今生無悔”, 又點可以唔提佢首超經典主題曲同埋多到你估唔到o既插曲s呢? 早前無意中睇到一篇關於「經典電視劇龍虎榜」o既報導, 「90年代十大經典劇集」居然有《今生無悔》! 咁都唔出奇…但係最估唔到o既係《今生無悔》首主題曲居然可以擊敗《誰可改變》…成為最經典o既主題曲! (其實我個人就認為《誰可改變》係更到肉o既!)
“今生無悔”的確係好經典, 但我估唔到有咁多人同我o地有一樣o既喜好, 仲會連隻主題曲都受歡迎到呢個地步…!
(“今生無悔”@香港電視)
“滄桑王傑無人能及”
最近新浪網推出「經典電視劇龍虎榜」，由中、港兩地網友投票選出各年代的經典電視劇、花旦、小生、角色及主題曲等各項；其中最矚目的，自然是「小生之王」及「花旦之後」兩個項目，分別由離開電視台已久的周潤發及無線鎮台之寶汪明荃以高票數獲得。由此可見，兩地觀眾仍好緬懷以往電視劇的日子。
不過，在「經典角色」一項，發哥在《上海灘》中的許文強，卻不敵已離世20年、在《射鵰英雄傳》中演黃蓉的翁美玲，實在教人始料不及。而在「80年代十大經典劇集」中，《射》劇亦贏了《上》劇，分別得第二及第三，第一是《神鵰俠侶》。
至於「90年代十大經典劇集」及「千禧年代十大經典劇集」，三甲排名是《笑看風雲》、《天地男兒》、《今生無悔》及《金枝慾孽》、《男親女愛》、《衝上雲霄》。
有劇集，自然亦有主題曲，在「經典主題曲」項目中，王傑主唱劇集《今生無悔》的主題曲《今生無悔》，成為榜首，以些微票數壓倒譚詠麟主唱《天師執位》主題曲《誰可改變》。
這個在1991年播出的劇集，共有40集，由黎明、周海媚及邵美琪等主演。未知是巧合還是特別作出安排，黎明飾演的浪子角色，簡直就是王傑真人生活的寫照，難怪他唱起來甚「入心入肺」，由他滄桑的歌聲唱來，實在不作他人想；為這個劇增添不少分數，也讓觀眾留下最深刻的印象。
當年這首歌瘋魔一時，大家不妨重溫極之有感覺的歌詞，與今時今日的作一番比較：
這常冷一臉我非偽裝 因時光一再無情盡繪
妳曾於笑面跌出淚水 哀濃於癡百倍
無論那些際遇 回憶都會太倦 恐發現 和前言違背
情願賠上一切 都不說後悔 應不應已經相會
我和妳不需再講甚麼 因曾彼此敬佩
來吧妳乾了吧 難得找到我吧
請莫問 曾如何落泊
還在塵世掙紮 酒可再共醉 添一杯慶祝相會
我和妳不需再講甚麼 因曾彼此敬佩
天無端很暗晦
(多得讀者xxx提供久違了o既“今生無悔”片頭…一定要同大家分享o下! 除o左可以聽番首經典主題曲, 仲可以重溫好多深刻o既場面…其實成個mv都好深刻, 不過最深刻係最尾將四個主角變成“四格漫畫”咁, 跟住四個一齊“令”個頭過o黎望住前面…哈哈! 呢個鏡頭仲要係每次去廣告時都會播o架…oh, 真係“回憶返埋o黎”! )
睇番d舊雜誌, 真係話黎明個角色係影射王傑…至少特技人o個part一定係啦! 當時我一開始都唔明點解會搵王傑唱主題曲, 反而兩位本身係歌星o既主角只可以唱插曲…原來呢套戲係講佢o既故事, 唔怪得知唱起o黎特別有味道, 真係一聽到隻歌, 就會諗起套劇! (同埋, 亦都可以避免o左兩位男主角爭唱主題曲呢個問題!)
相信所有同我差唔多年紀o既朋友, 聽番呢隻歌都一定會好有共鳴, 因為大家無可能會無睇過呢套劇…否則當時返學校同d同學仔都無話題啦!
(oh…仲搵到個“對不起我愛妳”卡拉ok版…o係k唱時成日笑呢個mv…好鬼娘! 仲玩“時光倒流70年”o個隻老套劇情? 特別留意曾自爆同黎明有一段情o既蘭子係呢個mv o既女主角! [不過都唔夠無線版mv有發瘟個“因財失義”女友陳梅馨做女主角咁經典…大家對呢個日播夜播o既mv有印象嗎?] 個mv係老套, 不過正所謂“橋唔怕舊, 最緊要受”…呢隻歌又確係經典, 百聽不厭! o黎喇, 係時候大家一齊o黎個“萬人大合唱”! 你唔係唔識唱呀?! Leon隨時會“第”支咪去你度o架喎…佢個style o黎o架嘛!)
而o個四首當時算係前所未有地多o既插曲s (不過我又真係好欣賞佢呢個安排, 勝在太公分豬肉又分得暈呀嘛!)…包括老黎o既"對不起我愛你" (呢隻就真經典囉…記得無記第一隻“勁雞推介”係邊隻歌嗎? 咪呢隻囉! 除o左因為o係劇中日播夜播勁hit外, 再一連兩個禮拜“勁歌推介”係咁推, 節目與節目間係咁播, 想唔識唱都幾難!)+"人在黎明" (其實我覺得呢隻歌都幾ok, 不過老黎li li lur lur, 其實唔係到後期去唱卡拉ok, 都唔知其實d歌詞exactly係講咩), 同埋發瘟o既"從未試過擁有"(留意:“擁…有…"兩個音係要好用力咁唱o既! 其實呢隻都唔弱o架, 好似拿o左三個禮拜冠軍), 同埋佢親自作曲+填詞+主唱o既"仍是痛在我心的你" (質素係不太高, 旋律同歌詞都係“repeat又repeat這旋律先算最強”…但係八/九十年代d流行曲o既特色就係咁o架啦! 同埋以一個業餘作曲填詞人o黎講, 其實都算ok, 而且聽多o左又覺得都幾好聽! 所以呢四首歌我都不時會翻聽同埋錄落mp3機度播)…o係每集片尾輪流播, 而四十集劇情裡面當然唔放過機會不停播啦…所以四首全數大hit, 當中又以“對不起”同埋“從未”再hit d…咁當然, 最hit o個隻一定係“多麼想用說話留住你…”啦, 無論你咩年紀, 你真係唔好話我聽你未聽過…否則我會鄙視你…!
(哈哈…連“人在黎明”mv都有啊! 又係好令人懷念的一首歌…但係睇呢個mv又不太能令人想起套劇! 只係覺得好殘暴! Mv另外o個位男角好熟面口, 有無人知佢係邊個呢?)
戲又hit, 歌又hit…呢套大製作當時有成40幾點收視…不過話時話, 其實接住佢上, 即我最喜愛o既暑期青春劇“浪族闊少爺”呢d咁o既小本製作, 都有40點收視…但當時o黎講又唔係超爆勁o個隻, 可能因為計算收視點o既方法同依家有D唔同!
仲有, 好欣賞當時“大眾電視”有個“長江一號&長江二號”爆料欄目 (唔知有無朋友記得?), 專係唔開名咁爆料…成日幫d電視節目或藝人改花名, 但係又改得好精警好到肉, 一睇就知係講緊邊個, 唔似得依家報紙雜誌o個d咩“媽咪姐爆料”欄目, 永遠睇完我都唔知佢想講邊個…最慘係個個睇唔明都走o黎問我, 但我自己都解答唔到!
當時“發瘟”呢個名, 都應該係佢o地幫溫兆倫改o既, 仲有“燒賣”,“天濛光”等…leon之後仲真係用o左呢個做佢作詞o既筆名 (隻歌好似係“我的感覺”)…仲有佢o地叫呢套劇做“呢世唔後悔”…真係簡單而好笑! 我當年最鍾意就係睇“大眾”呢個欄目!
一講起“今生無悔”, 真係令人勾起好多童年回憶…15年, 話咁快就過o左! 好令人回味的一套劇啊!
[此贴子已经被作者于2006-5-15 9:36:58编辑过]
|
IP卡
狗仔卡
发表于 2006-5-14 11:21:40
提升卡
置顶卡
沉默卡
喧嚣卡
变色卡
显身卡
发表于 2006-5-14 22:53:54
发表于 2006-5-15 01:24:47
楼主
!你....將整本"今生:特刊都scan了?好厚的喎!
是否起碼過一百頁?
想將"我本"延續到"今生"裡,其實相對起"今生"&"第三"嚟講"我本"咪幾好!起碼個結局佢哋都喺埋一齊吖!
